2019ની એક સવર્ણા

કાવ્ય : 57

*

સવર્ણા સાતમા આસમાને છે,
કામદેવ જેવો પ્રેમી જો મળ્યો છે!

કશી મણા નથી એના માણીગરમાં :
ભણવામાં અવ્વલ,
સ્પોર્ટ્સમાં મોખરે,
કોલેજનાં નાટકમાં હીરો,
અને પાછો કવિતાય લખે!

અત્તરમાં બોળેલા એના પ્રેમપત્રો
એ હજાર વાર વાંચીનેય
ફરી ફરી વાંચે છે.
સહેલીઓ તો તેમને ગાંધર્વ અને અપ્સરાનું જોડું કહે છે.

સવર્ણા સાતમા આસમાને છે,
કાર્તિકેય જેવો પ્રેમી જો મળ્યો છે.

પપ્પામમ્મી ખુશખુશાલ છે કાર્તિકેયને આવકારવા.
IASના ઈન્ટરવ્યૂમાં પાસ થઈ જાય
એ છોકરાની પર્સનાલિટીમાં શી ખોટ હોય!
કાર્તિકેયે તો સૌનાં દિલ જીતી લીધાં
એક જ મુલાકાતમાં,
ને સવર્ણાને તો ગ્રીન સિગ્નલ મળી ગયું.
એ તો આઠમા આસમાને પહોંચી ગઈ!

ઈર્ષાથી બળતી મંથરાઓની કાનાફૂસી એક દિવસ ઘેર પહોંચી ગઈ
ને સવર્ણાને પપ્પાએ ઠાવકાઈથી કહ્યું :
'આપણે તો નાતજાતમાં માનતા નથી,
પણ જરા એનું સ્કૂલ લીવિંગ તો જોઈ લેજે!'

ગુસ્સામાં લાલચોળ સવર્ણાએ
આ સાંભળતાં જ આખું ઘર માથે લીધું,
'કાસ્ટ, કાસ્ટ, કાસ્ટ
વોટ ઈઝ ધીસ બ્લડી નોનસેન્સ કાસ્ટ?'
એણે એ જ ક્ષણે ઘરથી છેડો ફાડી કાઢ્યો,
ને ચાલી નીકળી કાર્તિકેયના અંતરમાં કાયમી વસવાટ કરવા.

સવર્ણા આજે નવમા આસમાને છે,
કાર્તિકેય જેવો પ્રેમી લાઈફપાર્ટનર જો મળ્યો છે.

*

નીરવ પટેલ

10-2-2019