રાજા નીરો અને એની પ્રજા

કાવ્ય : 4

રાજા નીરો અને એની પ્રજા

*

ચારે કોર ઘેરી નિરાશામાં ગરકાવ છે લોકો :

દેવાદાર બની ગયેલો કિસાન
આત્મહત્યા કરી લે છે,
બેકાર મજૂર આત્મહત્યા કરી લે છે,
બળાત્કારનો ભોગ બનેલી સ્ત્રી આત્મહત્યા કરી લે છે.

ને હવે દલિત એક્ટિવિસ્ટ્સ પણ
આત્મવિલોપન કરવા લાગ્યા છે.

કોઈ એક્ટિવિસ્ટ
ગરીબ જમીનવિહોણા કુટુંબને
કકડો જમીન મળે
એટલા માટે વર્ષોના નિષ્ફળ સંઘર્ષ
પછી આત્મવિલોપન કરી લે છે.

કોઈ લારીગલ્લા યુનિયનનો
તરવરિયો યુવાન
જીવનગૂજારાનું સાધન છિનવાઈ જતાં
આત્મવિલોપનનો પ્રયાસ કરે છે.

કોઈ ગટરકામદાર રોજમદારમાંથી કાયમી થવા આત્મવિલોપનની આગોતરી જાણ કરે છે સરકારને.

પણ આત્મહત્યાથી જે બચી ગયો તે વળી ટોળાંઓના લિંચિંગથી મરે છે!

સરકાર છે તે 3000 કરોડનું પૂતળુ બનાવી લોકોને અસ્મિતા ને ગૌરવથી જીવવાનું ફરમાન કાઢે છે.

સરકારનો 4 કરોડનો સૂટ ગિનેસ બૂક ઓફ વર્લ્ડ રેકોર્ડમાં નોંધાયો છે તે જાણવા અખબારી યાદી કાઢે છે.

ચૂંટણી ટાણે સરકાર પવનપાવડી પર બેસી સાબરમતી નદીમાં ખાબકવાની છે,
(ના આત્મહત્યા કરવા નહીં,
સરકાર કોઈ પણ સ્ટંટ કરી શકે છે
એ બતાવવા ...)
ને એ જોવા સરકાર ઢંઢેરો પિટાવે છે.

ઉત્સવો, ઉત્સવો, ઉત્સવો ...
મેળાઓ, મેળાઓ, મેળાઓ ...

હરખનાં આ જોણાં જોતાં ઝાઝા લોકો આનંદની ચિચિયારીઓ પાડે છે.

નીરો અને એની પ્રજા!
એણે નજર બાંધી દીધી છે કે શું?
એમને લાગે છે કે દેશમાં બધું
વાઈબ્રન્ટ વાઈબ્રન્ટ છે!

*

નીરવ પટેલ

22-12-2018