ઈન્ડિયન ટ્રાફિક

કાવ્ય : 2

ઈન્ડિયન ટ્રાફિક

*

ધૂળના ગોટા ઉડાડતી
મૂછના આંકડા ચઢાવતી
રૂમલાયેલા આખલાની જેમ
જે તે-ને શિંગડે ચઢાવતી
એ મારફાડ ધસી આવી!

એના વિન્ડસ્ક્રીન પર
પોલિસવેનને હોય તેવા રાતાભૂરા રંગોમાં
ઢાલ-તલવાર-ભાલાનું સ્ટિકર જોઈ
બાપડી GJ-0-SC-234 (દૂરી-તિરી-ચોગ્ગી) સ્કૂટી તો ધ્રુજી ગઈ!
રોડ ઉપરથી સાવ નીચે ઉતરી ગઈ :
સલામત અંતરે રહેવું સારું!

જેવું ફાટક ખૂલ્યું કે
ટ્રાફિકવાળાને કચરી કાઢવા માગતી હોય
તેમ એણે ત્રાડ પાડી :
જો તો નથી કોણ આવે છે,
તારો બાપ આવે છે બાપ: AK-47.

આઘ્ઘો ખસ છક્કા.
RJ-0-BC-0006 એના
સરકારી રૂઆબની ઓળખ સમાન
રાતાભૂરા સ્ટિકરવાળી બાઈક છતાં
સાઈડમાં ઉતરી ગઈ!

આગળ પૂરપાટ જતી બોલેરોને ઓવરટેક કરવામાં નિષ્ફળ ગયેલ AK-47 ધૂંઆપુઆ થઈ ગઈ,
ને છેવટે આગળ થઈ એક ઝટકે એની સામે ઊભી રહી ગઈ!

બોડી પર હોકી ફટકારે તે પહેલાં એની નજર પડી નંબરપ્લેટ વિનાના આ બેફિકરા બાદશાહ પર.

બોલ, તારો નંબર બોલ?
'GJ-0-MC-786'.

AK-47તો મિયાંની મિંદડી થઈ
બે પગ વચ્ચે પિસ્ટન દબાવી,
કાંઈ ભાગી છે, કાંઈ ભાગી છે ...

*

નીરવ પટેલ
20-12-2018