સૌ સૌના ગાંધી

કાવ્ય : 46

આજે 30 જાન્યુઆરી,
સ્વતંત્ર ભારતનો ગોઝારો દિવસ.

સૌ દેશવાસીઓએ પોતપોતાની રીતે
ગાંધીજીને યાદ કર્યા,
દોજખ થતા જતા દેશમાં તેઓ સૌને આજે સવિશેષ યાદ આવ્યા.

હિંદુ મહાસભાએ પણ તેમને યાદ કર્યા :

અલીગઢમાં એકસાથે તેમણે
ગાંધી વધ દિવસ
અને ગોડસે શૌર્ય દિવસની
ઉજવણી કરી.

ગાંધીજીના પૂતળાને બનાવટી પિસ્તોલથી
ત્રણ ગોળી મારવામાં આવી,
પૂતળાની છાતીમાં છૂપાવેલ રંગ ભરેલી પોટલી ફાટી અને
એમાંથી બનાવટી લોહી વહેવા લાગ્યું.
પછી મહાસભાના એક્ટિવિસ્ટોએ રાવણદહનની જેમ મહાત્માના પૂતળાનું દહન કર્યું
'મહાત્મા નાથુરામ ગોડસે ઝિંદાબાદ'ના બુલંદ નારા સાથે.

પછી ગોડસેના ફોટાને સૌએ હાર ચઢાવ્યા
ને નમન કર્યા.
સૌએ મીઠાઈ ખાઈ મોં મીઠું કર્યું.

ગાંધીજીએ આ દેશને સ્વતંત્ર કર્યો :
હવે સૌ પોતપોતાની રીતે સ્વતંત્ર છે
કંઈ પણ કરવા માટે.
ગાંધીનો વધ કરો,
ગોડસેની પૂજા કરો.

દેશભક્તોની લાગણીને અભિવ્યક્ત થવા આ દેશનું બંધારણ અને શાસકો અને અદાલતો પૂરતી આઝાદી આપે છે :
તમે સ્વતંત્ર છો,
તમને કંઈ પણ કરવાની આઝાદી છે.
વધ કરો, લિંચિંગ કરો, એન્કાઉન્ટર કરો --
તમે ચાહો એ રીતે તમારી આઝાદીની ઉજવણી કરો.

નીરવ પટેલ

30-1-2019

( તા. 31ના 'ટાઈમ્સ'માં પ્રગટ તસવીર)