કેન્ડલ માર્ચ

બળાત્કાર અને હત્યાનો ભોગ બનનાર નિર્ભયાને ન્યાય મળે એ હેતુથી યોજાયેલ કેન્ડલ માર્ચ મેં જોઈ હતી ટીવીને પડદે.

પુરુષહિંસાનો ભોગ બનતી સ્ત્રીઓની એ સિરિયસ અને ડિસીપ્લીન્ડ પ્રોટેસ્ટ માર્ચ હતી,
અલબત્ત એમાં ન્યાય અને સમાનતામાં માનતા સહ્દયી પુરુષો પણ જોડાયા હતા.

ગઈ કાલે રાત્રે મેં પુલવામાના શહીદોના નામે યોજાયેલ કેન્ડલ માર્ચ જોઈ.

આખા રોડ પર હજારો સ્ત્રીપુરુષબાળકોના એક હાથમાં મિણબત્તીઓ હતી,
ને બીજા હાથમાં ભગવા ધ્વજો.

એ સૌ ગળાફાડ સૂત્રોચ્ચાર કરતાં હતાં,
માંગ કરતાં હતાં
વિધર્મી દુશ્મનદેશને આવો જ લોહિયાળ પાઠ ભણાવી બદલો લેવાની.
કેટલાક લોકો શહીદોના પરિવારો માટે ઝોળીઓ લઈ ફાળો પણ ઉઘરાવતા હતા.

સૂત્રોચ્ચારો ઓર પ્રવોકેટિવ થતા જતા હતા.
આયોજકોએ ટ્રેજડીને ધર્મ અને કોમના
એંગલથી ઓર ઘેરી ઘૂંટી હશે,
કદાચ કેન્ડલધારી ટોળાંઓ એટલે જ હોશોહવાસ ખોઈ બેઠાં હતાં.
રોડની પેલે પાર બોર્ડરલાઈન પર
વસતા સૌ પોતાનાં બંધ ઘરોમાંય ધ્રુજતા હતા,
આગજની કે હિંસા ભડકવાની દહેશત વર્તાતી હતી માહોલમાં.

આ શહીદોના માનમાં યોજાયેલ
કેન્ડલ માર્ચ હતી
કે કોઈ અદ્રશ્ય નેતાનો રોડ શો?
કદાચ ટોળાંઓની જાણ બહાર
કોઈ આ ગંજાવર ટ્રેજડીમાંથી પોતાને માટે ગંજાવર મતબેંક સર્જી રહ્યું હતું.

એક કેન્ડલ માર્ચ તમસથી જ્યોતિ તરફ,
એક કેન્ડલ માર્ચ તમસથી મહાતમસ તરફ જતીહતી.

*

નીરવ પટેલ

18-2-2019